ప్రధాన మంత్రి మోడీ రోడ్ షో లో భద్రత వైఫల్యం చోటు చేసుకుంది. స్వామీ వివేకానందుని జయంతి సందర్భంగా మోడీ కర్ణాటకలో రోడ్ షో నిర్వహించిన విషయం తెలిసిందే. ఈ రోడ్ షో లో మోడీ కారులో ఉండి అభివాదం చేస్తున్న సమయంలో జనంలో నుంచి ఓ యువకుడు చేతిలో దండతో మోడీ కాన్వాయ్ వైపు దూసుకొచ్చాడు. పటిష్టమైన భద్రత వలయాన్ని దాటి ఓ యువకుడు మోడీకి అత్యంత సమీపానికి రావటం తీవ్ర చర్చనీయాంశంగా మారింది. ఆ సమయంలో భద్రతా సిబ్బంది అప్రమత్తమై ఆ యువకుడు మోడీని తాకక ముందే పక్కకు లాగేశారు. అతడిని అరెస్టు చేసిన పోలీసులు మోడీ మెడలో దండ వేసేందుకే ఆ యువకుడు ప్రయత్నించాడని చెప్తున్నారు.
తరచూ రోడ్ షోలు నిర్వహించే ప్రధాని మోడీ.. అప్పుడప్పుడూ సెక్యూరిటీ వలయాన్ని దాటి జనాలకు దగ్గరగా వెళ్ళి వారిని పలకరిస్తుంటాడు. కానీ అంతకు ముందే ఆ ప్రాంతంలో అన్ని రకాల సెక్యూరిటీ చెకింగ్స్ పూర్తి చేస్తారు భద్రతా సిబ్బంది. ఈ సారి మాత్రం బ్లాక్ క్యాట్ కమాండోస్ ఉండగానే జనంలో నుంచి ఓ వ్యక్తి మోడీకి అత్యంత సమీపానికి రావటం సంచలనంగా మారింది. ఈ ఘటనపై కర్ణాటక ముఖ్యమంత్రి కార్యాలయం సీరియస్ గా ఉంది. అసలు అక్కడ ఏం జరిగిందో పూర్తి సమాచారం వెంటనే కావాలంటూ విచారణకు ఆదేశించింది.
