వైఎస్ రాజశేఖర్ రెడ్డి రాజకీయ వారసురాలిగా వైఎస్ఆర్ తెలంగాణ పార్టీ అంటూ కొత్త పార్టీని స్థాపించి తెలంగాణలో రాజకీయం మొదలుపెట్టింది షర్మిళ. రాజన్న బిడ్డగా తెలంగాణకు ముఖ్యమంత్రిని అవుతాననీ.. రాజన్న రాజ్యం తెస్తాననీ పదే పదే చెప్పే షర్మిళ.. కొద్ది రోజులుగా సైలెంట్ అయిపోయి తెరవెనుక రాజకీయాలకే పరిమితమైనట్టు కనిపిస్తున్నది. కొద్ది రోజులుగా ఆమె వైఎస్ఆర్ తెలంగాణ పార్టీని కాంగ్రెస్ లో విలీనం చేయబోతున్నదంటూ వార్తలు వెలువడుతున్న విషయం తెలిసిందే. దీనిపై షర్మిళ కూడా ఎలాంటి క్లారిటీ ఇవ్వటం లేదు. నిన్న ట్విటర్ ఓ ప్రకటన చేసిన షర్మిళ.. తాను తెలంగాణ బిడ్డగానే ఉంటానని చెప్పిందే తప్ప పార్టీ విలీనంపై మాత్రం ఎలాంటి క్లారిటీ ఇవ్వలేదు. ఇటీవలే ఆమె కర్ణాటక డిప్యూటీ సీఎం డీకే శివకుమార్ ను కలవటం.. రాహుల్ గాంధీకి పుట్టిన రోజు శుభాకాంక్షలు చెప్పటం.. ఇలా కొద్దికొద్దిగా కాంగ్రెస్ కు దగ్గరగా వెళ్ళినట్టు కనిపిస్తోంది. తెలంగాణలో రాజకీయ పరిణామాలు వేగంగా మారుతున్నట్టు కనిపిస్తోంది. బీఆర్ఎస్ రెబల్ నాయకులు పొంగులేటి, జూపల్లి కాంగ్రెస్ పార్టీలో చేరతామని ప్రకటించటం.. కోమటిరెడ్డి రాజగోపాల్ రెడ్డి కూడా మళ్ళీ సొంత గూటికి వచ్చేస్తారంటూ వార్తలు రావటం.. ఇలా కాంగ్రెస్ పుంజుకున్నట్టు కనిపిస్తోంది. ఈ నేపథ్యంలో షర్మిళ కూడా తన పార్టీని కాంగ్రెస్ పార్టీలో విలీనం చేయటం ఖాయంగా కనిపిస్తోంది. పైకి షర్మిళ అదేమీ లేదని చెప్తున్నా.. తెరవెనుక పరిణామాలు మాత్రం వేరే ఉన్నాయి.
అయితే.. తెలంగాణకు ముఖ్యమంత్రిని అవుతానంటూ శపథం చేసిన షర్మిళ.. కాంగ్రెస్ పార్టీలోకి వస్తే అందరికంటే ఎక్కువగా ఇబ్బంది పడేది రేవంత్ రెడ్డి. ఇప్పటికే ఎవరికి వారు సొంత పెత్తనం చేసే కాంగ్రెస్ పార్టీలో.. షర్మిళ వస్తే కొత్త పెత్తనం వచ్చినట్టే. ప్రస్తుతం కాంగ్రెస్ లో ఉన్న నేతలంతా ఒకప్పుడు వైఎస్ఆర్ అధ్యక్షతన పనిచేసిన వాళ్ళే. ఇదే రేవంత్ రెడ్డికి వచ్చిన చిక్కు. రాజశేఖర్ రెడ్డి ముఖ్యమంత్రిగా ఉన్న సమయంలో ప్రస్తుతం తెలంగాణ కాంగ్రెస్ పార్టీ నేతలంతా వైఎస్ఆర్ తో కలిసి పనిచేసిన వాళ్ళే.. ఒక్క రేవంత్ రెడ్డి తప్ప. ఆ సమయంలో రేవంత్ రెడ్డి తెలుగుదేశం పార్టీలో చంద్రబాబుతో పాటు రాజకీయం చేశాడు. కానీ ఇప్పుడు.. ఒకప్పుడు వైఎస్ఆర్ నడిపించిన అదే పార్టీని రేవంత్ రెడ్డి నడిపిస్తున్నాడు. ఇప్పుడు పిక్చర్ లోకి సడన్ గా షర్మిళ వస్తే.. పరిస్థితి గందరగోళంగా మారుతుంది. తెలంగాణ కాంగ్రెస్ పార్టీలో అధ్యక్షుడికి సమానంగా మరో నేత ఎంట్రీ ఇచ్చినట్టు అవుతుంది. ఇప్పటికే సీనియర్లతో రోజుకో తలనొప్పిని ఎదుర్కుంటున్న రేవంత్ రెడ్డికి ఇంకో కొత్త తలనొప్పి వచ్చి పడినట్టే. వి హనుమంతరావు, జగ్గారెడ్డి లాంటి నాయకులు రేవంత్ రెడ్డి అధ్యక్ష పదవికి రాజీనామా చేసి ఆ స్థానంలో షర్మిళను కూర్చోపెట్టాలని కొత్త పాట పాడినా ఆశ్చర్యం లేదు. వీళ్ళకు సడన్ గా వైఎస్ఆర్ పై వల్లమాలిన ప్రేమ పుట్టుకురాదనది చెప్పటానికి లేదు.. ఆ ప్రేమ రేవంత్ రెడ్డి మెడకు పాశంగా మారదని చెప్పటానికిీ లేదు. షర్మిళ కాంగ్రెస్ పార్టీలోకి రావటంపై ఇదివరకే రేేవంత్ రెడ్డి క్లారిటీ ఇచ్చాడు. ఆమె పార్టీలోకి వస్తే ఆహ్వానిస్తామనీ.. కానీ పెత్తనం చేస్తానంటే మాత్రం కుదరదనీ తనలో ఎక్కడో దాగున్న భయాన్ని బట్టబయలు చేసుకున్నాడు రేవంత్ రెడ్డి. సో.. ఖమ్మం జిల్లా నేతలు కాంగ్రెస్ పార్టీలోకి రావటం.. వెళ్ళిపోయిన రాజగోపాల్ రెడ్డి లాంటి నాయకులు రీ ఎంట్రీ ఇవ్వటం.. కాంగ్రెస్ పార్టీ పుంజుకోవటం.. ఇవన్నీ రేవంత్ కు ఎంత సంతోషాన్ని ఇస్తాయో.. వైఎస్ షర్మిళ కాంగ్రెస్ పార్టీలోకి రావటం అంతకు వంద రెట్లు భయాన్ని, టెన్షన్ ను ఇస్తాయనేది వాస్తవం.
