బీజేపీ అగ్రనేత అమిత్ షా తెలంగాణ పర్యటన రద్దైన విషయం తెలిసిందే. హైదరాబాద్ వస్తారనుకుంటే.. ఒక్క రోజు ముందు ఆయన తన పర్యటన రద్దు చేసుకున్నట్టు తెలంగాణ బీజేపీ నేతలు తెలిపారు. మహారాష్ట్ర, గుజరాత్ తదితర రాష్ట్రాల్లో తుఫాన్ ముప్పు పొంచి ఉండటంతో ప్రస్తుతం అమిత్ షా దానిపై దృష్టి సారించేందుకు నిర్ణయించుకున్నారనీ.. అందుకే తెలంగాణ పర్యటన రద్దు చేసుకున్నారనీ బీజేపీ నేతలు చెప్పారు. కానీ దీని వెనుక మరో కారణం ఉందంటూ కొత్త వార్తలు వినిపిస్తున్నాయి. ఖమ్మంలో ప్రస్తుతం పొంగులేటి శ్రీనివాస్ రెడ్డి ఏ పార్టీలో చేరకుండా అదుగో ఇదుగో అంటూ దాటవేస్తుండటం తెలిసిందే. అయితే.. ఖమ్మంలో జరగాల్సిన అమిత్ షా బహిరంగ సభలో అమిత్ షా సమక్షంలో పొంగులేటి బీజేపీ తీర్థం పుచ్చుకునేలా ఇదివరకే సీక్రెట్ గా ప్లాన్ చేశారనీ.. పొంగులేటి బీజేపీ ఎంట్రీ ఇస్తానని చెప్తేనే అమిత్ షా సభ ఖమ్మంలో ఏర్పాటు చేశారనీ సమాచారం.
కానీ, సడన్ గా పొంగులేటి మాట మార్చేశాడనీ.. బీజేపీలో చేరాలనే నిర్ణయాన్ని ఉపసంహరించుకున్నారనీ.. ఈ కారణంగానే అమిత్ షా సభ రద్దు చేయబడిందనీ ప్రచారం జరుగుతోంది. కేవలం పొంగులేటి చేరతారన్న కారణంగానే ఏ మాత్రం పట్టులేని ఖమ్మంలో బీజేపీ బహిరంగ సభ ఏర్పాటు చేసే ధైర్యం చేసిందనీ.. కానీ సడన్ గా పొంగులేటి ట్విస్ట్ ఇవ్వటంతో ఖమ్మం సభ వృధా ప్రయాస తప్ప మరేమీ లేదని తెలంగాణ బీజేపీ నేతలు నిర్ణయించుకొని.. అమిత్ షా పర్యటనను రద్దు చేసుకోవాలంటూ ఆయనను కోరారట. ఈ ప్రచారంలో నిజం ఎంత అనేది తెలియదు కానీ.. పొంగులేటి రెండు, మూడు రోజులుగా హడావుడి చేయటం మాత్రం నిజమే. కొత్త పార్టీ ఆలోచన పూర్తిగా పక్కన పెట్టేసిన పొంగులేటి.. తాను ఏ పార్టీలో చేరతానో ఒకటి రెండు రోజుల్లో మీకే తెలుస్తుంది అంటూ పరోక్షంగా దీని గురించే హింట్ ఇచ్చాడేమో అనిపిస్తోంది. లక్షలు ఖర్చు పెట్టి ఖమ్మం సభ ఏర్పాట్లు చేసిన తర్వాత చివరి నిముషంలో పొంగులేటి మాట మార్చాడని చెప్పుకుంటున్నారు.. ఆయన అంత పని చేయగల గొప్పోడే మరి.
