కాంగ్రెస్ సీనియర్ నేత రాహుల్ గాంధీనికి లోక్ సభకు అనర్హుడిగా ప్రకటించూ పార్లమెంట్ సచివాలయం సంచలన నిర్ణయం తీసుకున్న విషయం తెలిసిందే. దీనిపై దేశవ్యాప్తంగా కాంగ్రెస్ పార్టీ నేతలు తీవ్రంగా రియాక్ట్ అవుతున్నారు. సూరత్ కోర్టు పరువు నష్టం కేసులో రాహుల్ కు రెండేళ్ళ జైలు శిక్ష విధించిన నేపథ్యంలో.. పార్లమెంట్ సచివాలయం ఈ నిర్ణయం తీసుకుంది. కానీ రాహుల్ కు సూరత్ కోర్టు తన తీర్పుపై స్టే తెచ్చుకునేందుకు నెల రోజుల పాటు సమయం ఇచ్చింది. ఇంకా నెల రోజుల పాటు సమయం ఉన్నప్పటికీ.. స్టే తెచ్చుకునే అవకాశం ఉన్నాకూడా రాహుల్ పై సస్పెన్షన్ వేటు వేయటం బీజేపీ పగసాధింపు అంటూ కాంగ్రెస్ మండిడుతోంది. ఇక తెలంగాణ కాంగ్రెస్ నేతలు రాహుల్ గాంధీకి మద్దతుగా సంచలన నిర్ణయం తీసుకున్నారు.
శనివారం అత్యవసరంగా సమావేశం అయిన తెలంగాణ కాంగ్రెస్ నేతలు.. రాహుల్ గాంధీని సస్పెండ్ చేయటం పట్ల ఆగ్రహం వ్యక్తం చేశారు. బీజేపీ ప్రభుత్వం కావాలనే కాంగ్రెస్ పై కక్ష సాధిస్తోందనీ.. మోడీ కావాలనే రాహుల్ ను సస్పెండ్ చేయించాడనీ కాంగ్రెస్ నేతలు ఆరోపిస్తున్నారు. రాహుల్ కు మద్దతుగా కాంగ్రెస్ ఎంపీలంతా మూకుమ్మడి రాజీనామాలు చేయాలని నిర్ణయించుకున్నారు. రాహుల్ సస్పెన్షన్ ఎత్తివేయకపోతే కాంగ్రెస్ ఎంపీలంతా రాజీనామాలు చేస్తామని తీర్మానించారు. దేశవ్యాప్తంగా కాంగ్రెస్ శ్రేణులు రాహుల్ సస్పెన్షన్ ఎత్తివేయాలని డిమాండ్ చేస్తూ ఆందోళన కార్యక్రమాలు నిర్వహిస్తున్నారు.
