తెలంగాణ అసెంబ్లీ సమావేశాలు గరమ్ గరమ్ వాతావరణం మధ్య కొనసాగుతున్నాయి. తెలంగాణ ఆర్థిక శాఖ మంత్రి హరీష్ రావు, బీజేపీ ఎమ్మెల్యే ఈటెల రాజేందర్ కాంగ్రెస్ ఎమ్మెల్యే భట్టి విక్రమార్క మధ్య నువ్వా నేనా అన్నట్టుగా సభ జరుగుతోంది. తెలంగాణ అభివృద్ధి గురించి మంత్రి హరీష్ రావు వివరణాత్మకంగా మాట్లాడారు. కానీ దీనిపై కాంగ్రెస్ ఎమ్మెల్యే భట్టి విక్రమార్క ప్రశ్నల వర్షం కురిపించారు. ఉద్యోగాల సంగతి.. తెలంగాణ ప్రభుత్వం చేసిన అప్పుల సంగతి.. ఏందో చెప్పాలంటూ ప్రశ్నించారు. దీనికి కౌంటర్ గా హరీష్ రావు ఏమాత్రం తగ్గకుండా సమాధానం ఇచ్చారు.
ఇక ఈటెల రాజేందర్ హరీష్ రావుల మధ్య ప్రశ్నలు సమాధానాలు చాలా ఆసక్తికరంగా కనిపించాయి. కేంద్ర ప్రభుత్వం తెలంగాణకు అన్యాయం చేస్తోందని చెప్పటాన్ని ఈటెల విమర్శించారు. ఫైనాన్స్ కమిషన్ అన్ని రాష్ట్రాలతో సంప్రదించి కావాల్సిన నిధులను ఇస్తుందే తప్ప ఒక రాష్ట్రం మీద కేంద్రం కక్ష కట్టిందని చెప్పటం సరికాదని హితవు పలికారు. రేపు బీఆర్ఎస్ పార్టీ కేంద్రంలో గెలిచి దేశాన్ని పరిపాలించే సందర్భం రావచ్చనీ.. అలాంటి సమయంలో నిజాయితీతో పద్ధతితో వ్యవహరించటం మంచిదనీ చెప్పారు. ఇక ఈటెల కామెంట్లకు హరీష్ రావు తనదైన శైలిలో సమాధానం చెప్పారు. కేంద్ర ప్రభుత్వం వ్యవహార తీరును లెక్కలతో సహా వివరించే ప్రయత్నం చేశారు. తెలంగాణకు కేంద్రం ఇవ్వాల్సిన నిధులు ఇవ్వటం లేదన్న విషయాన్ని మరోసారి లెక్కలతో సభ ముందుంచారు. మొత్తానికి.. ప్రభుత్వ ప్రతిపక్షాల మధ్య వాడి ప్రశ్నలు, వేడి సమాధానాలతో తెలంగాణ అసెంబ్లీ ఆసక్తికరంగా సాగుతోంది.
