తెలంగాణలో ఉద్యోగాలు భర్తీ చేసి నిరుద్యోగుల సమస్యలను పరిష్కరించాలని డిమాండ్ చేస్తూ వైఎస్ఆర్ కాంగ్రెస్ పార్టీ అధినేత్రి వైఎస్ షర్మిళ ఆందోళనకు సిద్ధమయ్యారు. విషయం తెలిసిన పోలీసులు షర్మిళను ఇంటి దగ్గరే ఆపివేశారు. తనను రోడ్డు మీదకు రాకుండా అడ్డుకుంటున్నారని ఆరోపిస్తూ షర్మిళ తన అనుచరులతో కలిసి రోడ్డు మీద బైఠాయించగా.. పోలీసులు అరెస్టు చేశారు. దీంతో ఆగ్రహానికి గురైన షర్మిళ పోలీస్ కానిస్టేబుల్లను నెట్టివేస్తూ నోటికొచ్చినట్టు మాట్లాడుతూ మహిళా పోలీసుల పట్ల దురుసుగా ప్రవర్తించారు. పోలీసులు షర్మిళను అరెస్టు చేసి జూబ్లీ హిల్స్ పోలీస్ స్టేషన్ కు తరలించారు. దీంతో వైఎస్ఆర్ కాంగ్రెస్ పార్టీ కార్యకర్తలు ఆందోళనకు దిగారు.
షర్మిళ అరెస్టును నిరసిస్తూ వైఎస్ విజయమ్మ ఆందోళనకు దిగారు. కార్యకర్తలతో కలిసి నేరుగా జూబ్లీ హిల్స్ పోలీస్ స్టేషన్ కు చేరుకొని ఆందోళన చేపట్టగా పోలీసులు వారిని నిలువరించే ప్రయత్నం చేశారు. ఈ క్రమంలో ఓ మహిళా కానిస్టేబుల్ పై విజయమ్మ చేయి చేసుకోవటం వివాదాస్ఫదమైంది. దీంతో విజయమ్మపై కేసు నమోదు చేసిన పోలీసులు బలవంతంగా విజయమ్మను కార్లో ఎక్కించి వెనక్కి పంపించివేశారు. షర్మిళ, విజయమ్మ ఇద్దరూ పోలీసులతో దురుసుగా ప్రవర్తించిన వీడియోలు సోషల్ మీడియాలో వైరల్ గా మారాయి. తనను అడ్డుకుంటున్న మహిళా కానిస్టేబుల్ పై విజయమ్మ చేయి చేసుకోవటం వీడియోలో స్పష్టంగా కనిపిస్తోంది. అటు షర్మిళ కూడా మహిళా పోలీసులను తిడుతూ నెట్టేస్తున్న దృశ్యాలు సోషల్ మీడియాలో చక్కర్లు కొడుతున్నాయి.
