టీఎస్పీఎస్సీ పేపర్ లీకేజ్ వ్యవహారంపై ఆందోళన చేపట్టేందుకు సిద్ధమైన వైఎస్ఆర్ కాంగ్రెస్ పార్టీ అధినేత్రి వైఎస్ షర్మిళను పోలీసులు అరెస్టు చేసిన విషయం తెలిసిందే. ఈ క్రమంలో పలు ఆసక్తికరమైన విషయాలు చోటు చేసుకున్నాయి. షర్మిళను ఇంటి నుంచి బయటకు వెళ్ళకుండా హౌజ్ అరెస్ట్ చేసినందుకు పోలీసులపై తీవ్ర ఆగ్రహం వ్యక్తం చేసిన షర్మిళ.. తన సమీపంలోకి వచ్చిన మహిళా కానిస్టేబుల్ తో పాటు మరో ఎస్సైని తోసేసి రచ్చ రచ్చ చేసింది. ఇప్పటికే ఇందుకు సంబంధించిన దృశ్యాలు సోషల్ మీడియాలో చక్కర్లు కొడుతున్నాయి. ఇక ఇదే సంఘటనకు సంబంధించిన మరో వీడియో సోషల్ మీడియాలో తెగ ట్రెండ్ అవుతోంది.
షర్మిళను అదుపులోకి తీసుకోటానికి వచ్చిన పోలీసులతో ఆమె వాగ్వాదానికి దిగింది. “ఎవరు మీరు..? ఎందుకు వచ్చారు..? నేను బయటకు పోకుండా ఎందుకు కాపలా కాస్తున్నరు..? నేను ఎక్కడికైనా పోతా.. సిట్ ఆఫీసుకే పోతా.. అపోలో హాస్పిటల్ కే పోతా.. చర్చికే పోతా.. నాకు ఇష్టమొచ్చిన చోటికి పోయే హక్కు నాకు లేదా..?” అంటూ అక్కడున్న ఎస్సైపై ప్రశ్నల వర్షం కురిపించింది షర్మిళ. షర్మిళ అడిగిన ప్రతీ ప్రశ్నకూ సమాధానమిచ్చాడు ఆ పోలీసు అధికారి. “నాకు పని లేదా” అంటే.. “ఎందుకు ఉండదు మేడం.. ఉంటుంది..” అన్న ఆ పోలీస్.. “మీకు ఏపనీ లేకపోతే పోయి గొర్లను కాసుకోండి..” అని షర్మిళ అనగానే “ఇప్పుడు అదే పని చేస్తున్నం మేడం..” అంటూ కౌంటర్ ఇచ్చాడు. సడన్ గా సోషల్ మీడియాలో ప్రత్యక్షమైన ఈ వీడియో వైరల్ అవుతోంది.
