గుణశేఖర్ దర్శకత్వంలో భారీ బడ్జెట్ తో రూపొందించిన సమంత లేటెస్ట్ సినిమా శాకుంతలం ఈ రోజు నుంచే ఓటీటీలో స్ట్రీమింగ్ అవుతోంది. అమేజాన్ ప్రైమ్ లో గురువారం శాకుంతలం సినిమా స్ట్రీమింగ్ మొదలైంది. తెలుగు, తమిళం, కన్నడ, మళయాళ భాషలతో పాటు హిందీలో కూడా ఈ సినిమా చూడొచ్చు. భారీ అంచనాల మధ్య రిలీజ్ అయిన శాకుంతలం చివరికి బాక్సాఫీస్ వద్ద డిజాస్టర్ అయ్యింది. రుద్రమదేవి సినిమా తర్వాత మళ్ళీ మెగా ఫోన్ పట్టుకోని గుణశేఖర్.. ఈ సినిమాతో మళ్ళీ ఫామ్ లోకి వచ్చి పాన్ ఇండియా డైరెక్టర్ గా పేరు సంపాదించుకుంటాడని అంతా అనుకున్నారు. అటు సమంత కూడా ఈ ప్రాజెక్టుపై భారీ ఆశలు పెట్టుకుంది. చివరికి అటు గుణశేఖర్ కు.. ఇటు సమంతకు కూడా నిరాశనే మిగిల్చింది శాకుంతలం సినిమా.
గుణశేఖర్ డైరెక్టర్ గా ఫ్లాప్ అందుకోవటం కంటే సినిమా కోసం ఇన్వెస్ట్ చేసి కోట్లు నష్టపోవటమే అతడికి పెద్ద లాస్. కోట్లాది రూపాయలు ఇన్వెస్ట్ చేసిన దిల్ రాజు కూడా శాకుంతలం సినిమాతో భారీగానే నష్టపోయాడు. 5 భాషల్లో రిలీజ్ చేస్తే కనీసం సినిమా కోసం ఇన్వెస్ట్ చేసిన సగం బడ్జెట్ కూడా శాకుంతలం రాబట్టలేకపోయింది. దీంతో హడావుడిగా ఓటీటీ రిలీజ్ చేయాలని నిర్ణయం తీసుకున్నారు. సినిమా విడుదలైన నెల రోజుల్లోపే ఓటీటీ రిలీజ్ అయిపోయింది. అమేజాన్ ప్రైమ్ కూడా కాస్త ఎక్కువగానే చెల్లించి శాకుంతలం సినిమా రైట్స్ ను కొనుగోలు చేసింది. థియేటర్లో ఆడని సినిమాను ఓటీటీలో జనం ఏం చేస్తారో చూడాలి.