రామ్ చరణ్ కు షారూఖ్ రిక్వెస్ట్
ప్రపంచ వ్యాప్తంగా ఆర్ఆర్ఆర్ సృష్టించిన సంచలనం అంతా ఇంతా కాదు. ఇప్పటికీ ఈ సినిమా పలు దేశాల్లో అవార్డుల పంట పండిస్తూనే ఉంది. రెండు రోజుల క్రితం దర్శకుడు రాజమౌళి న్యూయార్క్ లో ఉత్తమ డైరెక్టర్ అవార్డు అందుకున్నాడు. అయితే.. ప్రస్తుతం ఆర్ఆర్ఆర్ ఆస్కార్ రేసులో నిలిచిన విషయం తెలిసిందే. కన్నడ సినిమా కాంతారతో పాటు ఆర్ఆర్ఆర్ కూడా ఆస్కార్ బరిలో నిలవగా.. ఆర్ఆర్ఆర్ ఖచ్చితంగా ఆస్కార్ గెలిచి తీరుతుందనే అంచనాలు బలంగా వినిపిస్తున్నాయి. ఈక్రమంలోనే బాలీవుడ్ నటుడు షారూఖ్ ఖాన్ చేసిన ట్వీట్ వైరల్ గా మారింది.
ఆర్ఆర్ఆర్ కు ఖచ్చితంగా ఆస్కార్ వస్తుందన్న అంచనాల నేపథ్యంలో.. షారూఖ్ ఈ ట్వీట్ చేశారు. మీరు ఆస్కార్ అవార్డును భారత్ తీసుకువస్తే.. దాన్ని ఒక్కసారి తాకే అవకాశం నాకు ఇవ్వండి.. అంటూ రామ్ చరణ్ ను కోరాడు షారూఖ్. అందుకు రిప్లై ఇచ్చిన రామ్ చరణ్.. తప్పకుండా సార్.. ఆర్ఆర్ఆర్ కు ఆస్కార్ వస్తే.. అది ఇండియన్ సినిమాకు వచ్చినట్టే.. అంటూ రిప్లై ఇచ్చాడు. ఒకప్పుడు ఇండియన్ సినిమాలను దశాబ్ధాల పాటు ఏలిన బాలీవుడ్.. ఇప్పుడు సౌత్ సినిమా ముందు మోకరిల్లింది. భారతదేశంలోనే కాదు.. ప్రపంచ వ్యాప్తంగా ఆర్ఆర్ఆర్ సినిమా.. తెలుగు జాతి సత్తా చాటుతోంది.
