పాదయాత్ర.. ఇది రాజకీయాల్లో చాలా కీలకమైన యాక్షన్ ప్లాన్. దేశ రాజకీయాల్లో అయినా సరే.. లోకల్ పాలిటిక్స్ లో అయినా సరే.. పాదయాత్ర రిజల్ట్ చాలా ఎఫెక్టివ్ గా ఉంటుందని చెప్పటంలో సందేహం లేదు. తెలుగు రాజకీయాల్లో కూడా పాదయాత్రలు ఎప్పటి నుంచో ఉన్నప్పటికీ.. వైఎస్ రాజశేఖర్ రెడ్డి చేసిన పాదయాత్ర తర్వాత పాదయాత్ర రాజకీయాలకు ఆయనే ఆద్యుడు అనే రేంజ్ లో జనంలో ముద్రపడిపోయింది. ఒకే ఒక్క పాదయాత్రతో వైఎస్ఆర్.. అధికారంలో ఉన్న చంద్రబాబు కుర్చీలో నుంచి దించేసి ఏకంగా రెండు సార్లు ముఖ్యమంత్రి అయిపోయాడు. దీంతో వైఎస్ యాత్ర ఎంతో మంది రాజకీయ నాయకులకు స్ఫూర్తి అయ్యింది. ప్రస్తుతం వైఎస్ఆర్ ప్రత్యర్థి చంద్రబాబు వారసుడు కూడా అదే స్ఫూర్తితో పాదయాత్ర మొదలుపెట్టాడు. మిగతా వాళ్ళ సంగతి పక్కనపెడితే ప్రస్తుత టీపీసీసీ చీఫ్ రేవంత్ రెడ్డి కూడా వైఎస్ స్ట్రాటజీనే ఫాలో అవుతున్నాడు. అచ్చంగా వైఎస్ ఫార్ములా మక్కీకి మక్కీ దించే ప్రయత్నం చేస్తున్నట్టు కనిపిస్తోంది రేవంత్ రెడ్డి.
టీపీసీసీ అధ్యక్ష బాధ్యతలు చేపట్టిన నాటి నుంచీ రేవంత్ రెడ్డి పాదయాత్ర ప్లాన్ చేస్తూనే ఉన్నాడు. కానీ తలో పాట పాడే కాంగ్రెస్ లో సింగిల్ మ్యాన్ అజెండా అంత ఈజీగా వర్కౌట్ చేయలేరు ఎవ్వరూ.. అది రేవంత్ అయినా సరే. అప్పుడెప్పుడో ప్లాన్ చేసుకుంటే ఇప్పటికి గానీ రేవంత్ పాదయాత్ర కార్యరూపం దాల్చలేదు పాపం. ఓ సారి జగ్గన్న ఎదురు తిరుగుతాడు.. మరోసారి భట్టి తిరుగుబాటు చేస్తాడు.. ఇంకోసారి ఉత్తమ్ విమర్శిస్తాడు.. ఓసారి కోమటిరెడ్డి బుంగమూతి పెట్టి అలుగుతాడు.. ఇంత మంది వ్యతిరేకుల మధ్య పాదయాత్ర కార్యరూపం దాల్చేలా చేయటం అంత ఈజీ కాదు మరి.
ఇంతకూ ఇదంతా ఎందుకు చెప్పుకోవాల్సి వస్తుందంటే.. రేవంత్ పాదయాత్ర విషయంలో వైఎస్ఆర్ సెంటిమెంట్ ను ఉన్నది ఉన్నట్టు ఫాలో అవుతున్నాడు. అప్పుడు వైఎస్ఆర్ చేవెళ్ళ చెల్లెమ్మ సబితా ఇంద్రారెడ్డి నియోజకవర్గం నుంచే పాదయాత్ర మొదలు పెడితే.. ఇప్పుడు రేవంత్ రెడ్డి అక్కయ్య సెంటిమెంట్ తో పాదయాత్ర ప్రారంభించే పనుల్లో ఉన్నాడు. ములుగు ఎమ్మెల్యే సీతక్క తన సొంత సోదరిగా చెప్పే రేవంత్ రెడ్డి.. ములుగు నుంచే పాదయాత్ర ప్రారంభించాలని నిర్ణయించుకున్నాడట. వైఎస్ఆర్ కు కలిసి వచ్చిన సిస్టర్ సెంటిమెంట్ తనకు కూడా కలిసి వస్తుందనేది రేవంత్ నమ్మకం. టీపీసీసీలో కాంట్రవర్సీ అయిన ప్రతీసారి సీతక్క రేవంత్ కు వెన్నుదన్నుగా నిలిచింది వాస్తవమే. తన మంచి కోరుకునే సీతక్క నియోజకవర్గం నుంచి పాదయాత్ర ప్రారంభిస్తే పాజిటివ్ ఫలితం ఉంటుందేమో అన్న రేవంత్ సెంటిమెంట్ మంచిదే. కానీ.. తెలంగాణలో ముఖ్యమంత్రి పదవి రావాలంటే.. అదీ కాంగ్రెస్ పార్టీకి అంత సులభం కాదు. పైకి ఎగబాకే పీత కాలు పట్టి మరో పీత లాగేసే కథ.. కాంగ్రెస్ కు అచ్చుగుద్దినట్టు వర్తిస్తుంది. ఇలాంటి పీతల మధ్య రేవంత్ అనే పీత పైకి ఎగబాకి ముఖ్యమంత్రి కావటం జరిగే పనేనా. ఒక వేళ నిజంగా కాంగ్రెస్ నేతలంతా ఏకతాటిపైకి వచ్చి రేవంత్ రెడ్డిని సపోర్ట్ చేసినా.. పదవి లాగేసుకోటానికి అక్కడ సీఎం కుర్చీలో ఉన్నది చంద్రబాబు నాయుడు కాదు.. చంద్రశేఖర్ రావు. ఈ పాదయాత్రలూ బస్సు యాత్రలూ సార్ ముందు పనిచేయవు.
