పొలిటికల్ అనలిస్టుగా.. అద్భుత రాజకీయ వ్యూహకర్తగా పేరున్న ప్రశాంత్ కిషోర్ చేసిన ఊహించని వ్యాఖ్యలు ఇప్పుడు దేశవ్యాప్తంగా సంచలనానికి కేంద్రంగా మారాయి. బీజేపీ అధికారంలోకి వచ్చి మోడీ మొదటిసారి ప్రధానమంత్రి కావటానికి ప్రశాంత్ కిషోర్ వ్యూహారే కారణమని చెప్తారు. అంతటి రాజకీయ వ్యూహకర్త నోట ఇప్పుడు మరోసారి మోడీకి, బీజేపీ ప్రభుత్వానికి కొండంత బలాన్నిచ్చే మాటలు వెలువడ్డాయి. వచ్చే ఎన్నికల్లో కూడా మోడీని ఓడించటం ప్రతిపక్షాలకు సాధ్యం కాదనీ.. వచ్చేసారి కూడా బీజేపీ ప్రభుత్వమే కేంద్రంలో కొలువుతీరటం ఖాయమని తేల్చేశాడు ప్రశాంత్ కిషోర్. హిందుత్వ మరియు జాతీయవాద సిద్ధాంతాలకు కట్టుబడి పనిచేసే బీజేపీని ఓడించాలంటే ప్రస్తుతం ప్రతిపక్షాల సిద్ధాంతాల వల్ల అది సాధ్యం కాదని స్పష్టంగా చెప్పాడు. ఎన్డీటీవీకి ఇచ్చిన ఇంటర్వ్యూలో పీకే ఈ వ్యాఖ్యలు చేశాడు.
ప్రతిపక్ష పార్టీలకు ఒక్కో పార్టీకి ఒక్కో సిద్ధాంతం ఉందనీ.. కానీ ఆయా సిద్ధాంతాలు ఎంతో బలమైన హిందుత్వ సిద్ధాంతం ముందు పనిచేయవని చెప్పాడు పీకే. గాంధీయిజం, అంబేద్కరిజం, కమ్యూనిజం.. ఇలా ఎన్నో సిద్ధాంతాలున్నా.. వేర్వేరుగా ఆయా సిద్ధాంతాలన్నీ బీజేపీ సిద్ధాంతాన్ని ప్రభావితం చేయలేవన్నాడు. ప్రతిపక్షాలన్నీ కలిసి ప్రయత్నిస్తే బహుషా వాళ్ళ బలం పెరగవచ్చు కానీ.. ప్రస్తుతం అలాంటి పరిస్థితులు లేవంటూ ప్రతిపక్ష పార్టీలకు చురకలంటించాడు. కాంగ్రెస్ పార్టీ ప్రస్తుతం మనుగడ కోసం పోరాడుతోందనీ.. బలహీనంగా ఉందనీ చెప్పిన పీకే.. రాహుల్ గురించి కూడా ఆసక్తికరమైన వ్యాఖ్యలు చేశాడు. భారత్ జోడో యాత్రతో ఏదీ మారలేదనీ.. రాహుల్ కు వచ్చే ఎన్నికల ఫలితాలు అసలైన పరీక్ష అంటూ చెప్పుకొచ్చాడు. అహంకారాన్ని, విభేదాలను, అభిప్రాయబేధాలను అన్నింటినీ పక్కనపెట్టి కేవలం అధికారమే లక్ష్యంగా, జనం మెచ్చే సిద్ధాంతాలతో పనిచేస్తే తప్ప మోడీని ఎదుర్కోవటం సాధ్యం కాదు అని ప్రతిపక్ష పార్టీలకు పరోక్షంగా పీకే సలహా ఇచ్చాడన్నమాట. పీకే చేసిన వ్యాఖ్యలపై ఒక్క పార్టీ నేత కూడా స్పందించలేదు.
