బీఆర్ఎస్ బహిష్కృత నేత పొంగులేటి శ్రీనివాస్ రెడ్డి కొత్త పార్టీ పెట్టబోతున్నాడనే టాక్ జోరుగా వినిపిస్తోంది. మొదట వైఎస్ఆర్ తెలంగాణ పార్టీ.. ఆ తర్వాత కాంగ్రెస్ పార్టీ.. నిన్న బీజేపీ.. ఇలా అన్ని పార్టీల నేతలను కలిసి మంతనాలు జరిపిన పొంగులేటి.. చివరికి కొత్త పార్టీ పెట్టబోతున్నాడనే వార్త తెలంగాణ రాజకీయాలను కాస్త ఆసక్తికరంగా మార్చేసింది. మరో ఆసక్తికరమైన విషయం ఏమిటంటే.. పొంగులేటి పెట్టబోయే కొత్త పార్టీ పేరు టీఆర్ఎస్.. అంటే తెలంగాణ రైతు సమాఖ్య. ఈ పేరుతో పొంగులేటి అనుచరులు ఇప్పటికే రిజిస్ట్రేషన్ కూడా చేయించేశారని చెప్పుకుంటున్నారు. తెలంగాణ ప్రత్యేక రాష్ట్ర సాధన కోసం కేసీఆర్ స్థాపించిన టీఆర్ఎస్ పార్టీ.. ఇటీవల భారత్ రాష్ట్ర సమితిగా జాతీయ పార్టీగా అవతరించిన విషయం తెలిసిందే. అందుకే పొంగులేటి టీఆర్ఎస్ పేరుతో పార్టీ రిజిస్ట్రేషన్ చేయించాడట.
తెలంగాణ వ్యాప్తంగా కనీసం సగం స్థానాల్లో టీఆర్ఎస్ పేరిట పోటీ చేయాలని పొంగులేటి టార్గెట్ పెట్టుకున్నాడట. ఆయన అనుచరులు ఈ దిశగా గట్టి గ్రౌండ్ వర్క్ చేసే పనిలో ఉండగా.. పొంగులేటి మాత్రం అన్ని జిల్లాల్లో తన పార్టీకోసం పని చేసే నేతలను వెతికే పనిలో ఉన్నాడట. కేసీఆర్ పైన వ్యతిరేకత ఉండి కూడా కేసీఆర్ పార్టీలోనే కొనసాగుతున్న వారిని వల వేసి తన పార్టీలోకి లాగేయాలనేది కూడా పొంగులేటి వ్యూహంలో ఒకటని సమాచారం. అన్ని జిల్లాల్లో బలమైన క్యాడర్ మరియు ఫాలోయింగ్ ఉన్న యువకులకు అసెంబ్లీ బరిలో దించనున్నారట. కరీంనగర్, నిజామాబాద్, నల్గొండ వంటి జిల్లాల్లో ఇప్పటికే ఈ దిశగా ప్రయత్నాలు ప్రారంభం అయ్యాయని తెలుస్తోంది. సొంత పార్టీ పెట్టే ఆలోచన ఉన్నప్పుడు.. వైఎస్ విజయమ్మ దగ్గరి నుంచి ఇటీవల ఈటెల రాజేందర్ దాకా ఇంత మందితో పొంగులేటి మంతనాలు ఎందుకు చేశాడో అర్థం కాని విషయం. దశాబ్ధాల చరిత్ర కలిగిన కాంగ్రెస్, బీజేపీ పార్టీలే అన్ని స్థానాల్లో అభ్యర్థులు దొరుకుతారో లేదో అని భయపడుతున్న వేళ.. పొంగులేటి కొత్త పార్టీ పెట్టి తెలంగాణలో అటు అధికార పార్టీతో పాటు మిగతా పార్టీలను తొక్కేయాలని స్కెచ్ వేయటం తెలివైన పనేనా అనేది రాజకీయ విశ్లేషకుల ప్రశ్న.
