వారాహితో సిద్ధంగా ఉన్నా జనసేనాని రాజకీయంగా జోరు పెంచేశారు. తెలంగాణ గడ్డ నుంచి ఏపీ పొత్తులపై కీలక వ్యాఖ్యలు చేసి అగ్గి రాజేసిన సేనాని.. ఏపీలో అడుగుపెడుతూనే వైసీపీ సర్కార్పై తన మార్క్ యాక్షన్ షురూ చేశారు. ఎస్సీ, ఎస్టీ సబ్ప్లాన్తో మొదలుపెట్టి.. గణతంత్ర దినోత్సవం వేళే వేర్పాటువాద రాజకీయమంటూ శివాలెత్తిపోయారు. “పబ్లిక్ పాలసీ తెలియని, అవినీతిలో మునిగిపోయిన మీరు రాష్ట్రాన్ని విడగొట్టేస్తారా? అది చూస్తూ మేము కూర్చుంటామా? అని ఓ రేంజ్లో విరుచుకుపడ్డారు. దీనికి అధికార వైసీపీ నుంచీ అదేస్థాయిలో కౌంటర్లొచ్చాయి. ఆలూలేదూ చూలూలేదు అన్నట్టుగా అధికారంలోకి రాకముందే అదిచేస్తాం ఇది చేస్తామంటున్నారంటూ వైసీపీ నేతలు పవన్ను కార్నర్ చేసే ప్రయత్నం చేశారు. దీంతో ఏపీ రాజకీయం గణతంత్ర దినోత్సవం సాక్షిగా రణతంత్రంగా మారింది.
ధర్మాన ఈ వ్యాఖ్యలపైనే సేనాని ఫైర్ అయిపోయారు. కానీ, ఇరు పార్టీల మధ్య యుద్ధం తీవ్రం కావడానికి రీజన్ మాత్రం ఈ వ్యాఖ్యలొక్కటే కాదు. అంతకుముందే బెజవాడ దుర్గమ్మ సన్నిధిలో వారాహికి పూజల నిర్వహించిన తర్వాత జగన్ సర్కార్ను టార్గెట్ చేశారు. విమర్శలతో పాటు ఎస్సీ, ఎస్టీ సబ్ప్లాన్ అంశాన్ని తెరపైకి తెచ్చారు. ఎస్సీ, ఎస్టీల సాధికారితకు జనసేన కట్టుబడి ఉందనీ, 22 శాతం జనాభా ఉన్నా నిధుల కోసం ఇంకా దేహి అనాల్సిన పరిస్థితి ఉండటం దారుణమని ఆవేదన వ్యక్తం చేశారు.
దీనికి వైసీపీ నుంచి పంచ్లు బుల్లెట్ల మాదిరి దూసుకొచ్చాయి. సేనానికి కౌంటర్గా రంగంలోకి దిగారు ప్రభుత్వ సలహాదారు సజ్జల రామకృష్ణారెడ్డి. వస్తూ వస్తూనే గెస్ట్ ఆర్టిస్ట్లా వచ్చి చంద్రబాబు ఇచ్చిన స్క్రిప్ట్ చదివి వెళ్లిపోతున్నారని ఫైర్ అయ్యారు. సబ్ ప్లాన్ నిధులు దుర్వినియోగం అంటున్న పవన్ ఏ ఆధారాలతో ఆ మాటన్నరో చెప్పాలని ప్రశ్నించారు.
సేనానికి ఎస్సీ, ఎస్టీ సబ్ప్లాన్పై సజ్జల కౌంటరిస్తే.. వేర్పాటువాద వ్యాఖ్యలు చేస్తే తోలు తీస్తానన్న కామెంట్కు కౌంటర్గా బొత్స సీన్లోకొచ్చారు. ధర్మాన మాట్లాడిన ఉద్దేశం వేరని వివరిస్తూనే.. గణతంత్ర దినోత్సవం కాబట్టి కాస్త హుందాగా మాట్లాడుతున్నా.. లేదంటే సీన్ మరోలా ఉండేదంటూ పవర్ పంచ్లు పేల్చారు.
ఈ కౌంటర్లు, రివర్స్ పంచ్లను కాస్త పక్కనపెడితే.. వారాహి ఎంట్రీ తర్వాత సేనాని గేర్ మార్చినట్టు స్పష్టంగా కనిపిస్తోంది. ఇటీవల రణస్థలం వేదికగా జరిగిన యువశక్తి సభలో ఉత్తరాంధ్ర యువత కష్టాలపై స్పష్టమైన వ్యాఖ్యలు చేశారు. ఉత్తరాంధ్ర వెనుకబాటు, వలసలు, కష్టాలూ, కన్నీళ్లపై వారితోనే చర్చించి జనసేన అధికారంలోకి వస్తే జరిగే మార్పిదే.. దీనికోసం మా తీర్మానాలివిగో అంటూ రెండు తీర్మానాలు సైతం చేశారు. కట్చేస్తే.. ఇప్పుడు ఎస్సీ, ఎస్టీ సబ్ప్లాన్ అంశంలో జనసేన రూలింగ్లోకి వస్తే ఏం జరుగుతుందో స్పష్టం చేశారు. ఇదే సమయంలో ఉధ్యోగుల సమస్యల పరిష్కారానికి తాను సిద్ధం అనే సంకేతాలిస్తున్నారు. ఈ పరిణామాలన్నీ సేనాని పొలిటికల్గా రైట్ ట్రాక్లోకే వచ్చేసారనే హింట్స్ ఇస్తున్నాయి. ఒక్కమాటలో ఇప్పటివరకూ పొలిటికల్ విమర్శలకే పరిమితమైన జనసేన అధినేత ఇకపై అధికారమే లక్ష్యంగా యాక్షన్ మార్చినట్టే కనిపిస్తోంది. మరి పవన్ దూకుడుపై అధికార వైసీపీ యాక్షన్ ఎలా ఉంటుందో చూడాలి.
#pawankalyan #andrapradesh
