ఏపీలో పొత్తులు, పంపకాలతో ఎలక్షన్ పాలిటిక్స్ ఊపందుకున్న వేళ.. పవన్ కళ్యాణ్ గురించి ఓ వార్త మీడియాలో గట్టిగా వినిపిస్తోంది. వచ్చే ఎన్నికల మీద ఫుల్ ఫోకస్ చేయటానికి పవన్ పక్కా ప్లాన్ వేసుకున్నాడనీ.. వచ్చే ఆర్నెల్లలో ఒప్పుకున్న సినిమాలన్నీ పూర్తి చేసి.. ఆ తర్వాత ఎన్నికల మీద ఫుల్ ఫోకస్ చేయాలని పవన్ గట్టిగా నిర్ణయం తీసుకున్నాడు అనేది ఆ వార్త సారాంశం. ఏపీ ఎన్నికలకు ఉన్నదే యేడాది సమయం. ఒక వేళ ముఖ్యమంత్రి జగన్ ముందస్తు ఎన్నికలకు వెళ్ళే నిర్ణయం గానీ తీసుకుంటే.. ఆ మాత్రం సమయం కూడా ఉండదు. పార్టీ పుట్టి తొమ్మిదేళ్ళు దాటి పదో యేట అడుగుపెట్టినా.. సంస్థాగత స్థాయిలో జనసేన పార్టీ నిర్మాణం ఇప్పటికీ జరగలేదు. బూత్ స్థాయిలో పార్టీ పటిష్ఠంగా తయారైనప్పుడే ఆ పార్టీ సంపూర్ణ నిర్మాణం జరిగినట్టు. నియోజకవర్గంలోని గ్రామగ్రామాల్లో తిరిగి పట్టు సాధించిన నాయకులు ఉన్నప్పుడు బూత్ స్థాయిలో పార్టీ నిర్మాణం జరుగుతుంది. అలాంటి నాయకులు జనసేనలో లేరు కాబట్టే వైసీపీ అధినేత జగన్.. దమ్ముంటే అన్ని స్థానాల్లో పోటీ చేయగలవా అంటూ సవాల్ చేస్తున్నాడు. ఇలాంటి స్థితిలో జనసేన పార్టీ ఉన్నప్పుడు.. ఇప్పటి నుంచే ఎన్నికలపై దృష్టి పెడితేనే నియోజకవర్గ స్థాయిలో పార్టీ బలోపేతం సాధ్యమవుతుంది. కానీ పవన్ మాత్రం వచ్చే ఆరు నెలల్లో సినిమాలు వేగంగా పూర్తి చేసి.. ఆ తర్వాత ఆరు నెలలు ఎన్నికలపై ఫోకస్ చేయాలని నిర్ణయించుకోవటం తప్పుడు నిర్ణయం అవుతుంది.
నిజానికి ఏ రాష్ట్రంలోనైనా సరే ఎలక్షన్ ఫీవర్ అనేది ఓ సంవత్సరం ముందే మొదలవుతుంది. నాలుగేళ్ళు పరిపాలనపై దృష్టిపెట్టిన ప్రభుత్వాలు.. ఆ చివరి యేడాది ఎన్నికలను దృష్టిలో పెట్టుకునే పనిచేస్తాయి. ఎన్నికల్లో గెలవటానికి ఏ వ్యూహాలతో వెళ్ళాలి.. మేనిఫెస్టోలో ఏ అంశాలు ఉండాలి.. ఎన్ని ఫ్రీ పథకాలు ఇస్తే జనాన్ని ఆకర్షించవచ్చు.. కులం, మతం లెక్కన ఓట్లు రాబట్టాలంటే ఏం చేయాలి.. ప్రతిపక్ష పార్టీ పుంజుకోకుండా ఎవరిని టార్గెట్ చేయాలి.. ఇలా ఎన్నికలు అంటే సవాలక్ష సవాళ్ళు, లెక్కలు ఉంటాయి. ఇలాంటి లెక్కలు వేయటానికి జనసేనలో తలపండిన రాజకీయ నాయకులు చాలా తక్కువ మంది ఉన్నారు. జనసేన పేరు చెప్తే పవన్ కళ్యాణ్.. ఆ తర్వాత నాదెండ్ల మనోహర్.. అప్పుడప్పుడు కనిపించి పలకరించే నాగబాబు.. వీరు తప్ప ఇంకెవరూ చెప్పుకోదగిన నాయకులు జనసేనలో లేరు. కాబట్టి పవన్ వీలైనంత తొందరగా ఎమ్మెల్యే అభ్యర్థులను వెతికే పని మొదలుపెట్టాలి. బూత్ స్థాయిలో కార్యకర్తలు పార్టీని బలోపేతం చేసే దిశగా గట్టి ప్రచారాన్ని ప్రారంభించాలి. దశాబ్ధాల అనుభవం ఉన్న తెలుగుదేశం పార్టీ నేతలే ఎప్పుడో పాదయాత్రలు, బస్సు యాత్రలంటూ ప్రజల్లోకి వెళ్ళటం మొదలుపెట్టేశారు. చంద్రబాబు, లోకేష్ కాలుకి బట్టకట్టకుండా రాష్ట్రమంతా తిరుగుతున్నారు. కానీ పవన్ మాత్రం ఇంకా సినిమాలు అంటూనే తిరిగితే ఈసారి కూడా పవన్ ప్రతికూల ఫలితాలనే చూడాల్సి వస్తుంది. రాజకీయం చేయాలంటే పవన్ కు ఆదాయమార్గం సినిమా ఒక్కటే అనేది నిజమే. కానీ.. ఎన్నికల యేడాదిలో కూడా సినిమాలపైనే ఫోకస్ చేస్తే.. డబ్బులు వస్తాయే తప్ప ఓట్లు రావు. ఒక్కో ఇంటికి పదేసి సార్లు తిరిగి అడుక్కుంటేనే ఓట్లు పడతాయన్న నమ్మకం లేదు. ఇక వారాహి ఎక్కి అంత దూరం నుంచి దండం పెట్టి ఊగిపోతూ ఉపన్యాసాలు ఇస్తే ఓటర్లు కరుణిస్తారా అనేది పవన్ కొంచం ఆలోచించాలి.
