షూటింగ్ లో ప్రమాదవశాత్తు తీవ్ర గాయాలపాలై ఐసీయూ ట్రీట్మెంట్ తీసుకున్న బిచ్చగాడు హీరో విజయ్ ఆంటోనీ ఆరోగ్యం దాదాపు పూర్తిగా మెరుగుపడిందట. ఈ మేరకు తన ఆరోగ్యం గురించి క్లారిటీ ఇస్తూ విజయ్ ట్వీట్ చేశాడు. విరిగిన ఎముకలు అతుక్కున్నాయి.. 90 శాతం కోలుకున్నాను.. ఈరోజు నుంచే బిచ్చగాడు-2 సినిమా షూటింగ్ లో పాల్గొంటాను అంటూ విజయ్ ట్వీట్ లో పేర్కొన్నాడు. విజయ్ ట్వీట్ తో అభిమానులు హ్యాప్పీ అని చెప్పాలి. యాక్సిడెంట్ గురించి విపరీతంగా పుకార్లు పుట్టుకొచ్చాయి. విజయ్ ప్రాణాలతో బయటపడటం కష్టమనీ.. ఐసీయూ నుంచి తిరిగి రావటం అసాధ్యమనీ ఇలా చాలా చాలా పుకార్లు షికార్లు చేశాయి.
2016లో వచ్చిన బిచ్చగాడు సినిమా విజయ్ ఆంటోనీ కెరీర్ నే మార్చివేసింది. సాదా సీదా సినిమాగా థియేటర్లలోకి వచ్చిన బిచ్చగాడు.. ఊహించని సెన్సేషన్ క్రియేట్ చేసి భారీ హిట్ గా నిలిచింది. టాలీవుడు లో బయ్యర్లకు కనకవర్షం కురిపించిన సినిమా బిచ్చగాడు. ఈ సినిమాకు విజయ్ సీక్వెల్ తెరకెక్కించే పనిలో ఉన్నాడు.
