ముంబైలో దారణ ఘటన వెలుగులోకి వచ్చింది. లివిన్ రిలేషన్షిప్ లో ఉన్న ప్రియురాలిని చంపేసి బెడ్ రూమ్ లోని బెడ్ బాక్స్ లో దాచిన ఘటన దేశవ్యాప్తంగా సంచలనం సృష్టిస్తోంది. హార్ధిక్ షా, మేఘా తోవీ అనే జంట మహారాష్ట్రలోని నలసోపారలో అద్దె ఇంట్లో ఉంటున్నారు. ఇంటిని అద్దెకు తీసుకునే సమయంలో రాసుకున్న రెంటల్ అగ్రిమెంట్ లో కాబోయే దంపతులు అని పేర్కొన్నారు. చాలా కాలంగా కలిసి ఉంటున్న ఈ జంట మధ్య అభిప్రాయ బేధాలు తలెత్తటంతో ప్రియురాలిని గొంతుపిసికి చంపేసి మంచానికి ఉన్న సీక్రెట్ బాక్స్ లో దాచేశాడు.
సంజీవ్ ఠాకూర్ అనే రియలెస్టేట్ ఏజెంట్ తమకు ఫోన్ చేసి సమాచారమిచ్చాడని పోలీసులు చెప్తున్నారు. కర్ణాటకలో ఉండే మేఘా బంధువు తనకు ఫోన్ చేసి మేఘాను చంపేసి తాను ఆత్మహత్య చేసుకుంటానంటూ హార్ధిక్ షా బెదిరిస్తున్నాడంటూ తనకు సమాచారం ఇచ్చిందని సంజీవ్ ఠాకూర్ చెప్తున్నాడు. అతడి ద్వారా సమాచారం అందుకున్న పోలీసులు హార్థిక్ ఇంటికి వెళ్ళి చూడగా ఇంటికి తాళం వేసి ఉంది. ఇంటి లోపలి నుంచి ఓ రకమైన దుర్వాసన రావటాన్ని గుర్తించిన పోలీసులు తాళం పగలగొట్టి లోపలికి వెళ్ళి వెతికితే మంచంలోపల ఉన్న బాక్స్ లో సగం పాడైపోయిన స్థితిలో మేఘా మృతదేహం కనిపించింది. మేఘా గొంతుపై నులిమిన ఆనవాళ్ళు కనిపించాయని పోలీసులు చెప్తున్నారు.
20 రోజుల క్రితమే వీరిద్దరు కొత్త ఫ్లాట్ లో దిగారని.. ఇద్దరి మధ్య డబ్బులకు సంబంధించిన గొడవలే మేఘా హత్యకు దారితీసినట్టు పోలీసులు చెప్తున్నారు. హత్య చేసి తప్పించుకొని పారిపోటానికి ప్రయత్నిస్తున్న హార్ధిక్ ను పోలీసులు వలపన్ని పట్టుకున్నారు. అన్ని రైల్వే స్టేషన్లలో నిఘా ఉంచిన పోలీసులు నగ్డా రైల్వే స్టేషన్లో అదుపులోకి తీసుకున్నారు. ప్రస్తుతం హార్థిక్ ను పోలీసులు విచారిస్తు్న్నారు.