ఎవరు ఎన్ని ప్రయత్నాలు చేసినా.. ఎన్ని కాంప్రమైజ్ పంచాయతీలు చేసినా తెలంగాణ పీసీసీ సెగలు మాత్రం చల్లారటం లేదు. రేవంత్ రెడ్డి పీసీసీ అధ్యక్షుడిగా ఎన్నికైన నాడు మొదలైన సీనియర్స్ వర్సెస్ రేవంత్ రెడ్డి గొడవ.. రోజురోజుకూ పెరుగుతోందే తప్ప తగ్గటం లేదు. ఈ క్లాష్ ను క్లోజ్ చేయటానికి ఢిల్లీ అధిష్టానం ఎన్ని ప్రయత్నాలు చేసినా.. ఎంత మంది ఇంచార్జిలను మార్చినా.. టీపీసీసీ కుంపటి మాత్రం భగ్గుమంటూనే ఉంది. ఓసారి మణిక్కం ఠాగూర్.. ఆ తర్వాత దిగ్విజయ్ సింగ్.. ఆ తర్వాత ఇప్పుడు మాణిక్ రావ్ థాక్రే.. ఇలా ఇంచార్జులు మారుతున్నారే తప్ప టీపీసీసీ అగ్గి మాత్రం చల్లారటం లేదు. రీసెంట్ గా తెలంగాణ రాష్ట్ర వ్యాప్తంగా నియమించిన కమిటీల బాధ్యుల వివాదం తర్వాత ఈ మంట తీవ్రస్థాయికి చేరుకుంది. సీనియర్లంతా కలిసి రేవంత్ రెడ్డిపై తిరుగుబాటు ప్రకటించి పెద్ద రచ్చే చేశారు. ఆ తర్వాత దిగ్విజయ్ సింగ్ వచ్చి కాంప్రమైజ్ చేశాడు. అయితే.. అప్పుడు ఈ పంచాయతీ కాంప్రమైజ్ అయినట్టే అయ్యింది కానీ మళ్ళీ మొదటికొచ్చింది. గాంధీభవన్ లో అడుగే పెట్టనని శపథం చేసిన కోమటిరెడ్డి వెంకట రెడ్డి అయితే.. మిగితా అందరికంటే పెద్ద షాకే ఇచ్చాడు రేవంత్ రెడ్డికి.
మాణిక్ రావ్ థాక్రే వచ్చీ రాగానే కాంగ్రెస్ సీనియర్ నేతలందరినీ ఓసారి ఫోన్ చేసి పలకరించి.. మెల్లగా మీటింగ్ పెట్టి అందరినీ కాంప్రమైజ్ చేయాలని భావించాడు. కానీ.. మిగితా నేతల సంగతి ఏమోగానీ.. కోమటిరెడ్డి మాత్రం షరా మామూలుగానే పాత మాటే చెప్పారు. రేవంత్ రెడ్డి తో కలిసి మీటింగ్ పెట్టి అందరినీ కలిపి మాట్లాడి పంచాయతీ కాంప్రమైజ్ చేయాలని భావించిన మాణిక్ రావ్ థాక్రేకు కోమటిరెడ్డి షాకిచ్చారనే చెప్పాలి. తాను ఎలాంటి మీటింగ్ కు రాననీ.. ఇంతకు ముందు చెప్పినట్టే గాంధీ భవన్ లో అడుగుపెట్టే ఉద్దేశమే తనకు లేదనీ క్రిస్టల్ క్లియర్ గా చెప్పేశాడట. కనీసం మాణిక్ రావు థాక్రే పిలిస్తేనైనా కోమటిరెడ్డి మీటింగ్ కు వస్తాడని.. ఇకనైనా ఓ పంచాయతి క్లియర్ అయిపోయి.. తనకు ఓ సీనియర్ మద్దతు దొరుకుతుందని భావించిన రేవంత్ రెడ్డికి నిరాశే ఎదురైంది. ఎన్నికలు దగ్గర పడుతున్న వేళ.. తెలంగాణ కాంగ్రెస్ ను బలోపేతం చేసి.. సీనియర్ జూనియర్ నేతలను కూడగట్టి.. ఎన్నికల్లో విజయం సాధించాలన్న రేవంత్ రెడ్డి వర్గాలని ప్రతిసారీ నిరాశే ఎదురవుతోంది. చూద్దాం.. భవిష్యత్తులో ఏమైనా మార్పులు వస్తాయేమో.
