ఆదిపురుష్ సినిమా ప్రీ రిలీజ్ ఈవెంట్ నిన్న రాత్రి తిరుమలలో జరిగిన విషయం తెలిసిందే. ఈవెంట్ ముగిసిన తర్వాత ఈ రోజు ఉదయం సినిమా డైరెక్టర్ ఓం రౌత్, హీరోయిన్ కృతి సనన్ కలిసి తిరుమలలో శ్రీవారిని దర్శించుకున్నారు. దర్శనం అనంతరం మాడ వీధుల్లో మీడియాకు కనిపించారు వీళ్ళిద్దరూ. ఈ క్రమంలో ఫోటోలకు ఫోజులిస్తూ.. కాస్త ఎమోషనల్ అయిన డైరెక్టర్ ఓం రౌత్.. హీరోయిన్ కృతి సనన్ ను కౌగిలించుకొని.. బుగ్గ మీద ముద్దుపెట్టాడు. ఇది ఇప్పుడు పెద్ద వివాదానికి కారణమైంది. పవిత్ర స్థలం అయిన తిరుమలలో ఇలా బహిరంగంగా కౌగిలించుకోవటం.. ముద్దు పెట్టడం అనేవి అసభ్యకరంగా అనిపించటం లేదా అంటూ డైరెక్టర్ ఓం రౌత్ ను తిట్టిపోస్తున్నారు. ఇందుకు సంబంధించి సోషల్ మీడియాలో ఓ పెద్ద చర్చే నడుస్తోంది. ఫోటోలు, వీడియోలు షేర్ చేస్తూ కామెంట్ల రూపంలో జనాలు వీళ్ళిద్దరిపై విరుచుకుపడుతున్నారు.
నిజానికి దీన్ని అంత వివాదం చేయాల్సిన అవసరం లేదేమో. బాలీవుడ్ వాళ్ళకు ఆడ, మగ తేడా లేకుండా కౌగిలించుకోవటం.. బుగ్గ మీద ముద్దు పెట్టడం అలవాటే తప్ప అసభ్యత అని వాళ్ళు అనుకోరు. కాకపోతే తిరుమల లాంటి పవిత్ర ప్రదేశంలో ఇలా చేయటం తప్పే అయినా.. వాళ్ళ మనసులో అసభ్యత లేదు అనేది కాస్త అర్థం చేసుకుంటే మంచిది. ఒకరిపై ఒకరు తమకు గల ఆప్యాయతను, ఎమోషన్ ను వ్యక్తం చేసే ఒక పద్ధతిగానే వాళ్ళు దీని గురించి ఆలోచిస్తారే తప్ప బుగ్గ మీద ముద్దు పెట్టుకోవటం తప్పుగా భావించరు. మనం కూడా దీన్ని అదే దృష్టితో చూస్తే మంచిదేమో. నిజానికి తిరుమలలో జరుగుతున్న అరాచకాలతో పోల్చితే ఇదేమంత నేరం కాదు. కొండ మీదే మందు, సిగరెట్లు విచ్చలవిడిగా అమ్మేయటం మనం చూడటం లేదా..? ఇతర మతాల ప్రచారం స్వేచ్ఛగా జరగటం మనకు తెలియదా..? అసలు టీటీడీ బోర్డులో సభ్యులుగా ఉన్న వాళ్ళే ఆదివారం చర్చికి వెళ్ళి ప్రార్థన చేస్తున్న విషయం నిజం కాదా..? భక్తుల తల వెంట్రుకల దగ్గరి నుంచి హుండీలో వేసే బంగారం దాకా కోట్ల రూపాయలు టీటీడీ అర్జిస్తే వాటికి లెక్కలు చెప్పకుండా అక్కడి ప్రభుత్వాలు ఎత్తుకెళ్తే ఎవ్వడూ అడిగేవాడు లేడు కానీ.. తమ సినిమా సక్సెస్ కావాలని దేవుడిని మొక్కి తన సహచరులపై ఆప్యాయతతో అలా తాకీ తాకనట్టు బుగ్గపై ముద్దు పెడితే.. పెద్ద రచ్చ చేస్తున్నారు. కొండ మీద జరిగే అన్ని అరాచకాలను చూసి కూడా ప్రశ్నించే దమ్ము లేని వాళ్లు.. ఫ్రీగా ట్విటర్ లో ఫేస్ బుక్ లో పోస్టులు పెట్టి విమర్శిస్తే ఎలా.. ఓ సారి ఆలోచించుకుంటే మంచిది.
