బీఆర్ఎస్ ఆవిర్భావ సభ సందర్భంగా ఖమ్మం జిల్లాకు ముఖ్యమంత్రి కేసీఆర్ వరాల జల్లు కురిపించారు. జిల్లాలోని 589 గ్రామ పంచాయతీకి 10 లక్షల చొప్పున మంజూరు చేస్తున్నానంటూ ప్రకటించారు. అలాగే మున్సిపాలిటీలుగా మారని 10 జనాభా పైబడి ఉన్న మేజర్ గ్రామ పంచాయితీలకు 10 కోట్ల రూపాయలు మంజూరు చేస్తున్నట్టు ప్రకటించారు. అలాగే ఖమ్మం మున్సిపాలిటీకి సీఎం ఫండ్ నుంచి 50 కోట్లు మంజూరు చేస్తున్నట్టు చెప్పారు. ఖమ్మం అభివృద్ధి కోసం ఏం కావాలన్నా వెంటనే మంజూరు చేయాలంటూ పక్కనే ఉన్న ఆర్థిక శాఖ మంత్రి హరీష్ రావుకు చెప్పారు.
అలాగే ఖమ్మం జిల్లాకు చెందిన ప్రతి జర్నలిస్టుకు ఇంటి స్థలాన్ని కేటాయించాలని ఆదేశించారు. వీడియో జర్నలిస్టులకు, ఫోటో జర్నలిస్టులకు కూడా ఇంటి స్థలం కేటాయించాలని హరీష్ రావును ఆదేశించారు. నెల రోజుల్లో ఇంటి స్థలాల కేటాయింపు పూర్తి చేయాలని చెప్పారు. జిల్లాలో స్థలాలు అందుబాటులో లేకపోతే ప్రైవేటు స్థలాన్ని కొనైనా సరే పూర్తి చేయాలని చెప్పారు. బీఆర్ఎస్ ఆవిర్భావ సభతో మొత్తానికి ఖమ్మం దశ తిరగనుంది.
