కబాలి సినిమాకు తెలుగులో నిర్మాతగా వ్యవహరించిన కృష్ణ ప్రసాద్ చౌదలి అలియాస్ కేపీ చౌదరిని అరెస్టు చేసినట్లు హైదరాబాద్ పోలీసులు వెల్లడించారు. కొకైన్ అమ్ముతుండగా రెడ్ హ్యండెడ్ గా పట్టుకున్నారు. కేపీ చౌదరి నుంచి సుమారు 80 గ్రాముల కొకైన్ తో పాటు 2 లక్షల నగదు, ముబైల్ ఫోన్లను స్వాధీనం చేసుకున్నట్టు పోలీసులు చెప్పారు. తెలుగు సినీ పరిశ్రమలో నిర్మాతగా, డిస్ట్రిబ్యూటర్ గా వ్యవహరించి కేపీ చౌదరి.. సినిమా వ్యాపారంలో కోట్ల రూపాయలు నష్టపోవటంతో ఇలా డ్రగ్స్ దందాలోకి దిగినట్టు సమాచారం. ఖమ్మం జిల్లా బోనకల్ కు చెందిన కేపీ.. టాలీవుడ్ లో పేరు మోసిన పబ్ లకు డ్రగ్స్ సరఫరా చేస్తునట్టు తెలుస్తోంది. గోవాలో ఇతడికి ఓ పబ్ కూడా ఉంది. టాలీవుడ్ కు చెందిన ప్రముఖులు గోవాకు వెళ్ళినప్పుడు ఇతడి పబ్ కు వెళ్తారనీ.. అలాగే టాలీవుడ్ కు డ్రగ్స్ సరఫరా చేసే చైన్ లో కేపీ కూడా ఒకడనీ సమాచారం.
నైజీరియన్ గ్యాంగ్ వద్ద సుమారు 100 కొకైన్ ప్యాకెట్లను కేపీ కొన్నాడన్న నమ్మదగిన సమాచారం మేరకు వల పన్నిన పోలీసులు కిస్మత్ పూర్ వద్ద కొకైన్ తో సహా పట్టుకున్నారు.
కబాలి సినిమాకు తెలుగులో నిర్మాతగా వ్యవహరించిన కేపీ.. సర్దార్ గబ్బర్ సింగ్, సీతమ్మ వాకిట్లో సిరిమల్లెచెట్టు, అర్జున్ సురవరం వంటి సినిమాలకు డిస్ట్రిబ్యూటర్ గా వ్యవహరించాడు. అయితే.. సినిమా వ్యాపారంలో ఉన్న సొమ్మంతా పోగొట్టుకున్న కేపీ.. సులువుగా డబ్బులు సంపాదించి పెట్టే డ్రగ్స్ వ్యాపారంలోకి అడుగుపెట్టాడు. టాలీవుడ్ డ్రగ్స్ చైన్ తో కేపీకి దగ్గరి సంబంధాలున్నాయని తెలుస్తోంది. కొద్ది రోజుల క్రితమే పోలీసుల బాధ తట్టుకోలేక గోవాలోని పబ్ ను కూడా కేపీ మూసేసి పూర్తిగా హైదరాబాద్ వచ్చేశాడట. వస్తూ వస్తూ భారీ డీల్ చేసి 100 ప్యాకెట్ల కొకైన్ కొనుగోలు చేసి హైదరాబాద్ తీసుకొచ్చాడు. వాటిని అమ్మేక్రమంలో పోలీసులకు పట్టుబడ్డాడు.
