రష్యా ఉక్రెయిన్ యుద్ధం మొదలై సంవత్సరం పూర్తి కావస్తున్న తరుణంలో అమెరికా అధ్యక్షుడు జో బైడెన్ చేసిన పని ప్రపంచాన్ని షాక్ కు గురి చేసింది. ముందస్తు ప్రకటన ఏమీ చేయకుండానే సడన్ గా బైడెన్ ఉక్రెయిన్ లో ప్రత్యక్షమయ్యాడు. ఉక్రెయిన్ రాజధాని కీవ్ లో ఆ దేశ అధ్యక్షుడు జెలెన్ స్కీ తో కలిసి పర్యటించాడు. దీనిపై జెలెన్ స్కీ కీలక ప్రకటన కూడా చేశాడు. జో బైడెన్ తో తాను సుదీర్ఘంగా సమావేశమయ్యాననీ.. ఉక్రెయిన్ కు కావాల్సిన ఆయుధ సాయంపై బైడెన్ స్పష్టమైన హామీ ఇచ్చాడని జెలెన్ స్కీ ప్రకటించారు. ముఖ్యంగా లాంగ్ రేంజ్ మిసైల్స్ అమెరికా నుంచి త్వరలోనే ఉక్రెయిన్ చేరుకుంటాయంటూ జెలెన్ స్కీ చేసిన వ్యాఖ్య యుద్ధం తీవ్రతను పెంచేదిగా కనిపిస్తోంది.
నిజానికి బైడెన్ సోమవారం సాయంత్రం పోలండ్ లో పర్యటించనున్నట్టు వైట్ హౌజ్ అధికారిక ప్రకటన చేసింది. కానీ పోలండ్ పర్యటనకు ముందు ఉక్రెయిన్ లో పర్యటిస్తారనేది మాత్రం రహస్యంగానే ఉంచారు. ఉక్రెయిన్ రాజధాని అయిన కీవ్ పై రష్యా సైన్యం మిసైల్ దాడులు చేస్తున్న తరుణంలో అమెరికా అధ్యక్షులు జో బైడెన్ కీవ్ లో పర్యటించటం సాహసోపేత నిర్ణయమంటూ అంతర్జాతీయ విశ్లేషకులు వ్యాఖ్యానిస్తున్నారు. ఇంత రహస్యంగా కీవ్ కు వెళ్ళి మరీ జెలెన్ స్కీతో భేటీ కావటం రష్యాను మరింత రెచ్చగొట్టడమేనని వారు చెప్తున్నారు. యుద్ధం మొదలైన నాటి నుంచి ఉక్రెయిన్ కు అమెరికా, యూరోపియన్ యూనియన్ దేశాలు భారీగా ఆర్థిక మరియు ఆయుధ సాయాన్ని అందించటం పట్ల గుర్రుగా ఉన్న పుతిన్.. ఇప్పటికే ఆయా దేశాలకు హెచ్చరిక చేశాడు. ఉక్రెయిన్ కు సాయం ఇప్పుడిప్పుడే తగ్గుతున్న తరుణంలో బైడెన్ ఉక్రెయిన్ లో పర్యటించటం వెనుక భారీ వ్యూహం ఉండొచ్చని విశ్లేషకులు చెప్తున్నారు.
