ఉక్రెయిన్ పై యుద్ధంతో రష్యా సైన్యానికి అండగా ఉంటూ వచ్చిన వాగ్నర్ గ్రూప్ అధినేత ప్రిగోజిన్ పుతిన్ పై తిరుగుబాటు ప్రకటించిన విషయం తెలిసిందే. అయితే.. పుతిన్ పై తిరుగుబాటు ప్రకటించిన మరుసటి రోజే ప్రిగోజిన్ రష్యాకు వ్యతిరేకంగా పోరాడాలనే ప్రయత్నాన్ని విరమించుకున్నాడు. పుతిన్ ను అధ్యక్ష పీఠం నుంచి దింపేస్తానంటూ తొలుత ప్రకటించిన ప్రిగోజిన్.. ఆ మరుసటి రోజే తాను మాస్కోకు వ్యతిరేకంగా వెళ్ళాలని భావించటం లేదని.. అలాగే తాను యుద్ధ క్షేత్రం నుంచి వైదొలగుతున్నాననీ ప్రకటించి అజ్ఞాతంలోకి వెళ్ళిపోయాడు. తాజాగా బెలారస్ అధ్యక్షుడు లుకషెంకో దీనిపై స్పందించాడు. ప్రిగోజిన్ తిరుగుబాటు ప్రకటించిన సమయంలో వాగ్నర్ గ్రూపు మొత్తాన్ని ప్రిగోజిన్ తో సహా నాశనం చేయాలని పుతిన్ నిర్ణయించుకున్నాడనీ.. తానే బలవంతంగా పుతిన్ ను శాంతపరిచి వాగ్నర్ గ్రూపును మరియు ప్రిగోజిన్ ప్రాణాలతో ఉండేలా పుతిన్ ను ఒప్పించాననీ వెల్లడించాడులుకషెంకో.
ఉక్రెయిన్ లోని బఖ్ముత్ ను చేజిక్కించుకునే క్రమంలో రష్యా సైన్యంతో కలిసి వాగ్నర్ గ్రూప్ సైనికులు వీరోచితంగా పోరాడారు. ఈ యుద్ధంలో ఉక్రెయిన్ సైన్యాన్ని ఎదుర్కోవటంలో వాగ్నర్ గ్రూపు ముఖ్య పాత్ర పోషించింది. కానీ.. అదే యుద్ధం సమయంలో రష్యా సైన్యం తమకు కావాల్సినన్ని ఆయుధాలు ఇవ్వకుండా తమ ప్రాణాలతో చెలగాటం ఆడుతున్నారంటూ ప్రిగోజిన్ ఆగ్రహం వ్యక్తం చేశాడు. చాలా రోజులుగా యుద్ధంలో తమకు కావాల్సిన సహాయ సహకారాలను రష్యా రక్షణ మంత్రి కావాలనే అడ్డుకుంటున్నాడని ప్రిగోజిన్ కోపంతో ఉన్నాడు. ఈ క్రమంలో బఖ్ముత్ ను చేజిక్కించుకున్న తర్వాత వాగ్నగ్ అధినేత ఇక రష్యా సైన్యానికి మద్దతుగా పోరాడ కూడదని నిర్ణయించుకొని పుతిన్ కు వ్యతిరేకంగా తిరుగుబాటు చేస్తున్నట్టు ప్రకటించాడు. ప్రపంచ వ్యాప్తంగా ఈ పరిణామం సంచలనం సృష్టించగా.. బెలారస్ అధ్యక్షుడు లుకషెంకో ఎట్టకేలకు ఈ ఘర్షణను నివారించగలిగాడు. ప్రస్తుతం ప్రిగోజిన్ బెలారస్ లోనే ఉన్నాడని కూడా లుకషెంకో ప్రకటించాడు.
