తెలంగాణ ఆర్థిక మంత్రి హరీష్ రావు అసెంబ్లీలో బీజేపీపై విరుచుకుపడ్డారు. బీజేపీ ఎమ్మెల్యే ఈటెల రాజేందర్, కాంగ్రెస్ ఎమ్మెల్యే భట్టి విక్రమార్క ప్రశ్నలకు సమాధానాలు ఇచ్చిన హరీష్ రావు.. కేంద్రంలోని బీజేపీ ప్రభుత్వంపై ఫైర్ అయ్యారు. బీజేపీ అద్భుతమైన విజయాలు సాధించిందని వ్యంగ్యాస్త్రాలు సంధించిన హరీష్ రావు.. మోడీ బ్లాక్ మనీ హామీ దగ్గర మొదలుపెట్టి.. పార్లమెంట్ లో బీజేపీ ప్రభుత్వం ప్రవేశపెట్టిన కొత్త బడ్జెట్ వరకు ఒక్కొక్క అంశం గురించి లేవనెత్తి మరీ బీజేపీని చెడుగుడు ఆడుకున్నాడు.. మంత్రి హరీష్ రావు.
బీజేపీ ప్రభుత్వం ప్రతి బడ్జెట్ కు ఒక పేరు పెడుతుందనీ.. అందమైన పేరు పెట్టడం తప్ప బడ్జెట్ లో ఇంకేమీ ఉండదని విమర్శించాడు. బీజేపీ బడ్జెట్ కు ధోకా అని పేరు పెట్టారు హరీష్ రావు. యేడాదికి 2 కోట్ల ఉద్యోగాలు ధోకా, అర్హులైన వారందరికీ ఇళ్ళు ధోకా, రైతుల సంక్షేమం..ధోకా, లోక్ పాల్ బిల్లు ధోకా, నదుల అనుసంధానం ధోకా.. ఇవన్నీ ధోకాలే. అంటూ బీజేపీని ఉతికి ఆరేశారు. ధోకాలే కాకుండా బీజేపీకి చాలా విజయాలు ఉన్నాయని మరోసారి వ్యంగ్యాస్త్రం సంధించిన హరీష్ రావు.. జీడీపీని మంటగలపటంలో సక్సెస్.. ఫుడ్ సెక్యూరిటీని నాశనం చేయటంలో సక్సెస్.. 160 లక్షల కోట్ల అప్పు చేయటంలో సక్సెస్.. అడ్డగోలు పన్నులు వేయటంలో సక్సెస్.. గ్యాస్, పెట్రోల్ ధరలు పెంచటంలో సక్సెస్.. ప్రజాస్వామికంగా ఎన్నికైన ప్రభుత్వాలను కూలగొట్టడంలో సక్సెస్.. ప్రతిపక్షాలపై ఈడీ, సీబీఐ దాడులు చేయటంలో సక్సెస్.. ప్రభుత్వ రంగ సంస్థలు అమ్మేయటంలో సక్సెస్.. ఇలా చాలా విజయాలు సాధించిందని ఘాటైన విమర్శలు చేశాడు హరీష్ రావు. హరీష్ రావుతో పాటు మిగతా ఎమ్మెల్యేలు, మంత్రులు కోరస్ అందించి వంతపాడటంతో అసెంబ్లీలో విచిత్రమైన సన్నివేశాలు కనిపించాయి. ప్రధానమంత్రి మోడీ, అమిత్ షా గనుక తెలంగాణ అసెంబ్లీ లైవ్ చూస్తే ఏమైపోతారో అనిపించింది.