విమానంలో బాంబు పెట్టామంటూ వచ్చిన ఫోన్ కాల్ పోలీసులను పరుగులు పెట్టించింది. ఇంటలిజెన్స్ అధికారులకు చెమటలు పట్టించింది. తీరా చూస్తే అక్కడేమీ లేదు. సోమవారం ఢిల్లీ నుంచి ఒడిషాలోని దేవ్ గఢ్ కు వెళ్ళాల్సిన విమానంలో బాంబు ఉందంటూ గుర్తు తెలియని వ్యక్తి పోలీసులకు ఫోన్ చేసి చెప్పారు. వెంటనే ఎయిర్ పోర్టు అధికారులకు పోలీసులు సమాచారం అందించగా అప్పటికే విమానం టేకాఫ్ అయింది. దీంతో అటు పోలీసులు, ఇటు ఎయిర్ పోర్టు అధికారులతో పాటు ఇంటలిజెన్స్ అధికారులు తలలు పట్టుకున్నారు. ఏ క్షణంలో ఏం జరుగుతుందోనని భయపడిపోయారు. విమానాన్ని దారి మళ్ళించి లక్నో విమానాశ్రయంలో ఎమర్జెన్సీ లాండింగ్ చేశారు. విమానాన్ని పూర్తిగా తనిఖీ చేయగా అందులో బాంబు లేదని తేలింది. దీంతో అంతా ఊపిరి పీల్చుకున్నారు. ఫేక్ ఫోన్ కాల్ చేసిన వారిని గుర్తించేందుకు పోలీసులు కేసు నమోదు చేసి దర్యాప్తు మొదలుపెట్టారు.
ఇదిలా ఉంటే హైదరాబాద్ లోని శంషాబాద్ నుంచి చెన్నై వెళ్ళే విమానంలో బాంబు ఉందంటూ గుర్తు తెలియని వ్యక్తి పోలీసులకు ఫోన్ చేశాడు. దీంతో అప్రమత్తమైన అధికారులు ఎయిర్ పోర్టు అధికారులకు సమాచారం ఇవ్వగా వెంటనే విమానంలో తనిఖీలు చేసారు. కానీ బాంబు లేదని తేలటంతో ఫోన్ చేసిన వ్యక్తిని గుర్తించేందుకు ప్రయత్నాలు మొదలుపెట్టారు. గంటల వ్యవధిలోనే ఫోన్ చేసిన వ్యక్తిని పోలీసులు పట్టుకున్నారు. హైదరాబాద్ నుంచి చెన్నై వెళ్ళాల్సిన ఓ వ్యక్తి విమానాశ్రయానికి ఆలస్యంగా చేరుకున్నాడు. దీంతో అధికారులు అతడిని లోనికి అనుమతించలేదు. దీంతో విమానంలో బాంబు ఉందంటూ ఫోన్ చేశాడు. తాను సమయానికి ఎయిర్ పోర్ట్ చేరుకోలేకపోయాననీ.. బాంబు ఉందని చెప్తే విమానం ఆలస్యంగా బయల్దేరుతుందని భావించి అలా చేశాననీ ఆ వ్యక్తి పోలీసులకు చెప్పాడు. పోలీసులు కేసు నమోదు చేసి విచారిస్తున్నారు.
