కేంద్ర పాలిత ప్రాంతం మరియు రాష్ట్రంగా రెండు హోదాలతో దేశ రాజధానిగా ఉన్న ఢిల్లీ ప్రభుత్వంపై ఇప్పటి వరకూ ఉన్న అన్ని అనుమానాలకు సమాధానం చెప్తూ సుప్రీంకోర్టు సంచలన తీర్పును వెలువరించింది. ఢిల్లీలో పరిపాలన సర్వీసులపై పూర్తి అధికారం ప్రజల ఓట్లతో ఎన్నికైన ప్రజా ప్రతినిథులతో కూడిన ప్రభుత్వానికే ఉంటుంది తప్ప కేంద్ర ప్రభుత్వానికి ఉండదని సుప్రీంకోర్టు తేల్చి చెప్పింది. ఢిల్లీ అడ్మినిస్ట్రేటివ్ పై నియంత్రణాధికారం ఎవరికి ఉండాలో చెప్పాలంటూ ఢిల్లీ ముఖ్యమంత్రి అరవింద్ కేజ్రీవాల్ సుప్రీంకోర్టును ఆశ్రయించగా సుదీర్ఘ విచారణ చేసిన సుప్రీంకోర్టు ఈ విషయంపై స్పష్టమైన తీర్పును వెలువరించింది. అడ్మినిస్ట్రేషన్ పై పూర్తి అధికారాలు ఢిల్లీ ప్రభుత్వానికే ఉండాలని.. అందుకు ఢిల్లీ లెఫ్టినెంట్ గవర్నర్ పూర్తిగా సహకరించాలంటూ స్పష్టం చేసింది.
ఢిల్లీ అడ్మినిస్ట్రేషన్ పై పూర్తి అధికారాలు కేంద్రానికే ఉంటాయంటూ 2015లో కేంద్రం హోంశాఖ ఆదేశాలు జారీ చేసింది. అప్పటికి ముఖ్యమంత్రిగా ఉన్న కేజ్రీవాల్ కేంద్ర హోంసాఖ నిర్ణయాన్ని సవాల్ చేస్తూ ఢిల్లీ హైకోర్టులో పిటిషన్ దాఖలు చేశాడు. పిటిషన్ ను విచారించిన ఢిల్లీ హైకోర్టు కేంద్ర హోంశాఖ నిర్ణయాన్ని సమర్థించింది. కేంద్ర పాలిత ప్రాంతం కాబట్టి కేంద్రానికే అధికారాలు ఉండటం సబబేనని అప్పడి ఢిల్లీ హైకోర్టు న్యాయమూర్తి తీర్పునిచ్చారు. దీంతో కేజ్రీవాల్ సుప్రీంకోర్టును ఆశ్రయించారు. అప్పటి నుంచి విచారణ సుదీర్ఘంగా సాగుతూ వచ్చింది. కేంద్ర పాలిత ప్రాంతం మరియు రాష్ట్రం హోదా కలిగి ఉండటం మరియు దేశ రాజధానిగా ఉండటంతో ఢిల్లీ అడ్మినిస్ట్రేషన్ పై నియంత్రణాధికారం ఎవరికి ఉండాలనేది తేల్చటం కష్టంగా మారింది. సుదీర్ఘ విచారణ అనంతరం తీర్పును వెలువరించిన సుప్రీంకోర్టు ఢిల్లీ ప్రభుత్వం వైపు నిలిచింది. ప్రజలు ఓట్లు వేసి ఎన్నుకున్న ప్రజా ప్రతినిథులతో నడిచే ప్రభుత్వానికే అధికార యంత్రాంగంపై నిర్ణయాధికారం ఉండాలనేది ప్రజాస్వామ్యబద్ధమైన నిర్ణయం అని చెప్పింది. అధికారులు చివరికి రిపోర్టు చేయాల్సింది సంబంధిత శాఖల మంత్రులకే కాబట్టి తమ తీర్పు సబబేనని సమర్థించుంకుంది.