వెయ్యి కోట్లకు పైగా వసూళ్ళు సాధించిన రాజమౌళి సినిమా ఆర్ఆర్ఆర్ వసూళ్ళతో పాటు అవార్డుల పంట పండించిన విషయం తెలిసిందే. గోల్డెన్ గ్లోబ్, క్రిటిక్స్ చాయిస్ సహా.. ఎన్ని అవార్డులుంటే అన్ని ఆర్ఆర్ఆర్ సినిమానే వరిస్తున్నాయి. లేటెస్ట్ గా హీరో రామ్ చరణ్ అమెరికాలో HCA అవార్డు అందుకున్న విషయం తెలిసిందే. ఇందుకు సంబంధించిన వీడియోలు సోషల్ మీడియాలో వైరల్ గా మారాయి. రామ్ చరణ్ ఫ్యాన్స్ అయితే పండగ చేసుకుంటున్నారనే చెప్పాలి. అయితే.. లేటెస్ట్ గా ఇందుకు సంబంధించి మరో విషయం వివాదాస్ఫదంగా మారింది. HCA అవార్డు సినిమా పేరిట అనౌన్స్ అయిందనీ.. కాకపోతే రామ్ చరణ్ అమెరికాలో ఉండటం వల్ల సినిమా యూనిట్ తరఫున చెర్రీ అందుకున్నాడనీ అంటున్నారు.
ఈ అవార్డు సినిమా యూనిట్ లోని అందరు నటీ నటులకు, ప్రతి టెక్నీషియన్ కు అనౌన్స్ చేయబడిందనీ.. కాకపోతే రామ్ చరణ్ ఒక్కడే అమెరికాలో ఈ అవార్డు తీసుకోవటంతో ఆయనకు మాత్రమే ఈ అవార్డు వచ్చినట్లు మీడియాలో తప్పుడు ప్రచారం జరుగుతోందనీ ఎన్టీఆర్ ఫ్యాన్స్ చెప్తున్నారు. తారకరత్న మరణంతో ఎన్టీఆర్ అమెరికా వెళ్ళలేకపోయాడనీ.. లేకపోతే ఎన్టీఆర్ కూడా ఈ అవార్డు అందుకునే వాడనీ వారి వాదన. దీనిపై ఆర్ఆర్ఆర్ టీమ్ కూడా క్లారిటీ ఇచ్చింది. ఇది సోలో అవార్డు కాదనీ.. టీమ్ అవార్డు అనీ చెప్పారు టీమ్. ఒక రామ్ చరణ్ కు మాత్రమే అవార్డు వచ్చినట్టు సోషల్ మీడియాలో పోస్టులు పెట్టడం పట్ల ఎన్టీఆర్ ఫ్యాన్స్ కాస్తంత ఆగ్రహంతో ఉన్నట్టు కనిపిస్తోంది. త్వరలో ఎన్టీఆర్ కూడా ఈ అవార్డు అందుకుంటే గానీ వీరి కోపం తగ్గదేమో.