పెళ్ళి కాకుండా ఒంటరి జీవితం గడుపుతున్న వారికి సాయం చేయాలని హరియాణా ప్రభుత్వం నిర్ణయించుకుంది. 45 సంవత్సరాలు పైబడిన స్త్రీ, పురుషులందరికీ నెలవారీ పెన్షన్ ఇవ్వాలని సరికొత్త నిర్ణయం తీసుకున్నట్టు హరియాణా ముఖ్యమంత్రి మనోహర్ లాల్ ఖట్టర్ వెల్లడించారు. వచ్చే నెల రోజుల్లో ఈ పథకానికి సంబంధించిన మార్గదర్శకాలు విడుదల చేస్తామని చెప్పారు.
దేశంలో ఎక్కడా ఇలా పెళ్ళి కాకుండా ఒంటరిగా జీవించే వారికి పెన్షన్ ఇచ్చే పథకం లేదు. హరియాణాలో అమలు చేస్తే ఇదే తొలిసారి కావచ్చు. వృద్ధులు, వికలాంగులు, వితంతులకు ప్రస్తుతం పెన్షన్ పథకాలు అమలులో ఉన్నాయి. పెళ్ళి చేసుకోని వాళ్ళకు కూడా ఆర్థికంగా సాయం చేయాలనే ఉద్దేశంతో ఇలాంటి పథకాన్ని రూపొందించామని ఖట్టర్ చెప్పారు. అయితే.. 45 సంవత్సరాలకు పైబడిన వారికి అని మాత్రమే చెప్పారే తప్ప మరే ఇతర మార్గదర్శకాలు, అర్హతలు వెల్లడించలేదు. పెన్షన్ మొత్తం ఎంత అనేది కూడా చెప్పలేదు. త్వరలోనే ఇందుకు సంబంధించిన పూర్తి వివరాలు వెల్లడిస్తామని ముఖ్యమంత్రి చెప్పారు. మనోహర్ లాల్ ఖట్టర్ చేసిన ఈ ప్రకటన ప్రస్తుతం దేశవ్యాప్తంగా చర్చనీయాంశంగా మారింది. సోషల్ మీడియాలో దీనికి సంబంధించిన పోస్టులు అప్పుడే కనిపించటం మొదలుపెట్టాయి. మా రాష్ట్రంలో కూడా ఇలాంటి స్కీమ్ పెడితే బాగుంటుంది అంటూ కొంత మంది తమ రాష్ట్రాల ముఖ్యమంత్రులను కోరుతూ పోస్టులు పెడుతున్నారు
